Da·al salo, A·chikrangoni skanggipa saksa jakgitelanina dakgrikdilgipa aro politics-ni a·bao dilgipa ong·chenggipa Pa Sonaram R. Sangma-ni chang 108-gipa siani salko Bakrapur songo maniangaha. Sangma, A·chikrangoni saksa British-rangni sason ka·aniko bilchi jakchi dakgrik dinggrikaniko jakkalgija constitution-ni bilko jakkale jakgitelanina aro A·chik jatna kam ka·e dilangaha. Ia somoio Pa Sangma-ko uni mingnamgipa kamrangna mittelpile, janggini tom·tomanina Isolo bi·aniko dakangaha.
Uko mande ra·e manianiona, GHADC-ni CEM Albinush Marak mongsonggipa ong·e sokbaaha. Unbaksa, gipinrang jekai songni nokni manderang, ma·aparang, giljani dilgiparang, Sangma-ni ma·drangrang aro dingtang dingtang gadangni manderangba bakko ra·angtokaha. Tom·ao aganengon Marak dingtangmancha Sonaram R. Sangma Memorial Trust Society-ko manianio bakko ra·na cholko on·ahanina mittelangaha. A·chikrangni mingnamgipa dilgipa saksako gisik ra·na tangkame rakkiangkuchina CEM sakanti jatskarangkoba mol·molangan baksa didiangaha.