Da·al salni bako West Garo Hills a·jani Tura, Alotgre cricket kal·chakramo Meghalaya Cricket Association (MCA), Board of Control for Cricket in India (BCCI) ni General Manager, Abey Kuruvilla-ko mande ra·e rimchaksoaniko dakangaha.
BCCI-ni General Manager, Abey Kuruvilla battangimin sal somoirango BCCI-ni selector gitcham aro India a·songna 1990 bilsi jolrango bowler ong·e kal·angaha. Kuruvilla-ni dingtang mancha da·al salo Tura, Alotgre Cricket kal·chakramona re·baniara ia biapo mikkangchi ong·atnasienggipa BCCI-ni U-19, U-23 aro Cooch Behar Trophy, Col. C.K. Nayudu Trophy-rangko ong·atna miksonganio nirokaniko daksona sokbaaha.
Ia somoio Kuruvilla baksa Meghalaya Cricket Association (MCA)-ni dilgiparangba apsan sokbae kal·chakram biapko, umpire-rangni kutturi, player-rangni kutturi, bang·a nang·kuenggiparang aro neng·nikanirangko nirokange ma·sie ra·angaha. Abey Kuruvilla kal·chakram biapko niangmane, Alotgre cricket stadium-ko namen namgipa, an·sengbegipa aro nitobegipa ong·a ine janapangaha. Tom·anio aganengon ua pilak neng·nikanirangko chagrongani bidingo mikkangchi chanchie kamrangko ka·na ka·donganikoba on·angaha.
