Ma·mong sorkarini chamatgipa Pradhan Mantri Gram Sadak Yojana (PMGSY) Phase-III scheme-ni ning·o a·doko 1,250 km mangna bate ramarangko tarina a·bachengatna am·engani bidingo Deputy Chief Minister PWD (Roads) In-charge Prestone Tynsong parakangaha. Tynsong-ni Assembly-o aganchakanigitade (PMGSY) Phase-I scheme-ni ning·o nanganikri tangka paisarangko chamate Ministry of Rural Development 400 km mang ramarangko tarimanaha.
Indake ong·engon a·dok sorkari ramarangko tarina gnigipa Phase-na chamataniko senge dongenga jeon 600 km mang gape Detailed Project Report (DPR)-ko ma·mong sorkarina on·manaha aro uko janapgimin somoio man·a ka·dongsoenga ine Tynsong u·iatangaha. Una agreba a·dok sorkarini dabigimin PMGSY-III ko a·bachengnagita dakna nang·gnirangko a·dokni Ministry tarisamsoaha aro project-rangko nangchomotanio pangchakesa PMGSY-III scheme-o bak ong·atan baksana 2024-2025 financial bilsini gisepon 1,250 km mang ramarangko tarie matchotatnagita miksongani donga ine Tynsong aganangaha.
Re·anggipa salrango Photjaud–Tynnai songoni Mawkyrwat block-ni ning·o ong·gipa Mawbidong-ona ramarangko tarinagita dabiani gisepon ramarangko tarina ma·mong sorkari chamatjagenchimode a·dok sorkarinigita chamate tarie on·china Mawkyrwat-ni MLA Renikton Lyngdoh Tongkhar aganangskaaha. Iani gisepon janapgimin ramako tarina tangka paisarangko chamatani bidingo maming sing·ani dong·ja maina ian nangchomotgipa ramarangni ning·o ga·akgipa ong·a aro da·o ma·mong sokarini tangka chamataniko senge dongenga ine Tynsong aganchakangskaaha.
