Congress dolni sakgittam MLA-rang NPP baksa bakrimeanichi Congress dolni saksakamkam dongrikgipa MLA Ronnie V Lyngdoh an∙tangni Leader of Opposition-ni kamko watani ja·mano ua TMC dolni sak 5 MLA-rang baksa opposition dolo bakrime kamko ka∙angna tik ka∙angskaaha.
Uandake TMC-ni sak 5 MLA-rang baksana Ronnie V Lyngdoh bakrimanichi uamang chu∙gimik sak 6 MLA ong·aha. Iani gisepon uamang TMC-ni dilgipa Dr. Mukul Sangma-ko Leader of Opposition aro Ronnie V Lyngdoh-ko opposition Chief Whip-ni kamo donagita tik ka∙e a∙dokni Speaker Thomas A. Sangma-ko grongangaha. Iani bidingo pilak nanga kamrangko ka∙ani ja·mano u∙iatnagita Speaker aganangaha.
