Mawkyrwat-ni MLA, Renikton Lyngdoh, District Institute of Education and Training (D.I.E.T)-ko poraina a·doktango brangenggiparangni bidingo assembly session-ni short duration discussion-o aganangaha. A·dokni chadamberang dingtang dingtang kona noksik biaprangona D.I.E.T poraina re·angtokenga. Bang·bata chadamberang West Bengal, Karnataka, Nagaland aro gipin a·dokrangonaba re·ange skigipa ong·na poraienga ine Lyngdoh aganangaha. Gipin a·dokrango uamang sorkarini ra·chakgijagipa a·damrango poraimanode bil jak, tangka paisa aro somoinigita inditan rusiatako man·gen ine ua agandapangaha.
Apsandaken Kharkutta-ni MLA Rupert Marak-ba NGH Resubelpara-o D.I.E.T-ko poraina dingtang dingtang a·jarangoni sokbae skie ra·enggiparangni baridapaniko nikna man·e nanggipa rika cho·anirangko jekai classroom, hostel aro skigiparangna quarter-rangko nangdapengani bidingo sorkariko ta·rake nirokatchina didiangaha.
Ia short duration discussion-o Nongstoin-ni MLA Gabriel Wahlang-ba bakko ra·e uni constituency-o D.I.E.T poraienggiparangna sak 50 rangnasan biap donge chu·onggijaniko nike sak 100-ona bariatchina aganangaha. Ia chasongo bang·a skulrang donge aro pass ka·giparang bang·rorobaanichi kamrangna branggipa batroroengani gisepon D.I.E.T-o skie ra·na cholko man·genchimode ian uamangna mingsa ka·dongani chol ong·gen ine Wahlang aganangaha.
Uamangni nanganirangko janape sorkariko didianina, D.I.E.T-rango seat-rangko National Council for Teacher Education (NCTE)-nigitasa pilak nanganirangko nigrike ra·chakesa kamrangko ka·ronga ine Education Minister Rakkam Sangma aganchakangskaaha. D.I.E.T-rango seat-rangko tikatnagita aro nanggipa rika cho·anirangko daknagita a·jani dal·ao, mande bang·anio aro merit-o pangchake porikka ra·chengesa skie ra·na cholko NCTE on·ronga ineba Rakkam Sangma agandapangaha.
