Directorate of Meghalaya Tourism-ni kosako 2023 bilsio Tura songjimao ong·atgipa Talent Hunt program-na kakket ong·gijagipa tangka chamatani ba fund sanction letter-ko mesoke cha·bokna jotton ka·anina Garo Hills Talent Development Society (GHTDS) matnangataha. September 2023-ni ia chittio Shillong Directorate Office-oni tangkarangko chamataniko mesokaha. Indake ong·genchimoba, changgni mangna Shillong reange am·sandion, nirokatna ja·machakaha aro tangkarangko chamata dongjaha.
Iani bidingo Shillong Tourism Office-oni Director-ni chittiko mesokchina aro apsankon Tura-ni office-oba sing·sandichina aganaha. Uamangni ku·pattianiko man·e Tura-ni office-o jako ra·enggipade Shillong-oni maming kobor man·gijaniko parakangskaaha ine GHTDS aganangaha. Iarangni ja·mano uamangko chang 12 gipa Talent Hunt season 2023-ni dorgastoko on·taina aganaha. September jao Director-ni fund sanction letter-ko man·soahaoba December jaoni kingking mamingkon dakjaha. Ian sal somoi, ding·ol kramchi aro bil jaksa neng·gramani ong·aiaha ine uamang parakataha.
Ia a·selrangko chagronganina GHTDS ra·chakna man·gijaniko parakate, man·gnina kakket ong·e dorgasto gal·giminko on·china aro una agre on·dapanikoba bi·ani dongja ine uamang aganangaha. Tourism department-ni kragija dakanina, society dingtangmancha Minister-rangko, opposition dilgiparangko aro department-ko, kamtangko name ka·jaenggipa officer-ko am·sandichina didiataha. Da·o dipet department-ni kosako maming badi ka·anirang dongkuja ine koborna parakataha.
