Da·al salni bako West Garo Hills a·jani Tura, District Auditorium-o jatni saksa dilgipa, Union Minister aro Lok Sabha-ni Speaker gitcham Lt. Purno Agitok Sangma-ni 77 gipa atchiani salko manian baksana National Peoples’ Party (NPP) dolni chang 12-gipa Foundation day-ko maniangjolaha. Jatni saksa dilgipako mande ra·ani ia dal·begipa tom·bimonganiko P A. Sangma Foundation-ni dilgiparang dakdile ong·atangha.
Ia tom·bimonganiona P A. Sangma-ni jikgipa Soradini K. Sangma, uni depante aro MIDC-ni Chairman James Pangsang K. Sangma sokbae bakko ra·angaha. Unbaksa aro gipin dilgiparang chong·motan a·dokni Education Minister Rakkam A. Sangma, PHE Minister Marcuise N. Marak, Meghalaya Legislative Assembly-ni Speaker Thomas A. Sangma, Deputy Speaker Timothy D. Shira, GHADC-ni CEM aro adita MDC-rangba re·bae tom·anio bakrimeaha. Una agreba NPP party-ni dilgiparang, PASF Abong Noga college-ni skigiparang, chatro chatrirang, officer-rang, chatchi ma·drangrang aro ma·aparangba bakrimpangaha.
Da·al salo ia tom·bimonganiko ABDK-ni General Secretary, Rev. Dilseng M. Sangma rongtalgipa sastroko poraie aro bi·dile a·bachengataha. Nokgipana ring·mittelgipa aro jatna a·songna rasong on·gipa gitrangkoba ia program-o ring·mesokangaha. Ia somoio JEE Topper Jonathon Singkam Sangma-koba mande ra·aniko dakenba una momento on·an baksana tangka gong lakh 1-ko dolni palo uni ma·apaana on·angaha. Tura, Forest Tilla-ni Jonathon Singkam Sangma ia 2024 bilsini batangimin JEE Mains porikao top-o gegni rank-ko man·aha, India asong gimiko B-Planning-o 1-gipa rank-ko aro B. Architecture-o 6 gipa rank-ko ua an·tangni bimchipanichi man·aha.
NPP dolni pilak re·bagipa dilgiparang ia tom·bimongani bako P A. Sangma-ni janggi tanganiko gisik ra·e uni kam, a·dokko re·dilani aro dilani gimin nambea kattarangko aganangaha. Garo Hills-ko namroro silroroatani, rika cho·anirango tang·doatani aro nangchongmotgipa kamrangko P A. Sangma-ni ra·bae on·anggiminrangni bidingoba bang·a dilgiparangan talatangaha.
