Meghalaya a∙dok ni palo Health & Family Welfare aro Agriculture Minister Dr. M. Ampareen Lyngdoh, delegaterang baksa sanna bannani aro ge∙a gamani bidingo u∙i ma∙sianiko tang∙doatna, Japan a∙song baksa bakrime kam ka∙angna miksonge re∙angaha. Cabinet Minister baksa Health & Family Welfare-ni Secretary Ram Kumar, Tsurumaki Onsen Hospital-ona September jani 2 tariko re∙ange, Meghalaya a∙dokni ia hospital-o kam ka∙enggipa sak gittam nurserang jean Shisha Lapyntngen, Lauda B Sangma aro Banniewkor Mukhim koba grongbajolaha.
Una agreba Tokyo songjinmao donggipa Alive facility centre jean budepa buchuma rangko nirokgipa a∙damona organisation-ni President baksa chanchirimaniko dake Meghalaya a∙dokoni sak 10 nurse rangko ia centre-ona rakkina miksonganiko parakataha. Re∙baenggipa September jani 17 tariko Shillong songjinmao job fair ong∙atnasienggipao Alive oni re∙banasienggipa dolrang bakko ra∙ange Meghalaya sorkarinigita dakchakaniko on∙chinaba mol∙molataha.
September 3 tariko, Meghalaya dolrang Tokyo ni Indian Ambassador ko gronge Japan a∙song aro Meghalaya a∙dokni bakrime kam ka∙ani bidingo golpogrikanggen. September ni 5 tariko Ampareen Lyngdoh Miyagi Prefecture ni Midori Farm chi re∙angskae Shiitake mushroom ba dambong ni jat ni ge∙ani bidingo u∙ianiko baridapatna cholko ra∙anggen. Ian a∙dokni Agriculture Department, Hill Farmers Union aro Yats Corporation baksa re∙anggipa 2019 bilsio MoU-ko soi ka∙grikangganiko mangrakatna miksongani ong∙a.
Japan a∙songchina re∙angani miksonganiara Meghalaya a∙dokni sanna bannani aro ge∙a gamaniko namdapatna gipin international gadangni changa sapaniko skie ra∙na cholko on∙anggen ine u∙iatangaha.
