Ja 34 na dormaha on∙chipgija donanina, GHADC-o kam ka·gipa Non Gazetted Employees Association (NGEA)-rangni jingjengatani da∙alo sal 12 gapangaha. Council-o ka∙gipa dilgiparangni uamangna namgipa ku∙rachakaniko on∙a ka∙dongsogenchimoba da∙alona kingkingba GHADC-ni Executive Committee (EC)-rangni tom∙e chanchianio batanggimin somoio uamangna order on∙gipakon ia changoba on∙taiaha jekon NGEA dolrang uamangni ra∙chakna man∙gijaniko parakangaha.
GHADC-o kam ka∙giparangna Council-ni dilgiparangni order-ko on∙anigitade uamangni dormaharangko 4th pay commission-o pangchakesa on∙a miksongaha jekon pilakan ra∙chakna man∙jawa ine NGEA dolrang janapangaha. Uamangna dormaharangko je janiko on∙a miksonggenchimoba 5th pay commission-o pangchakesa on·a nanggen ine uamang a∙kangangaha. Indake uamangni dabianiko chu∙sokatosa ia jingjengataniko dontongate office re·e kam ka∙anirangko a∙bachengataigen ineba NGEA talatangaha.
Lekka-o segatgimingita 5th pay commission-o pangchake dormaharangko on∙a ku∙rachakgenchimoba da∙alona kingkingba 4th pay commission-nigitasa uamangna dormaharangko on·kuenga ineba u∙iatangaha.
