Kusimkolgre B-o a∙arangna gondogol ong∙ani bidingo Marcuise Marak tom∙e chanchidilanga

Cabinet Minister aro Williamnagar-ni MLA Marcuise N. Marak da∙al salo GHADC-ni CEM Albinush R. Marak, GHADC Deputy CEM Nikman Marak, East Garo Hills-ni Deputy Commissioner Vibhor Aggarwal aro District Revenue Department-ni officer-rang baksa Williamnagar Circuit House-o chanchirimaniko dakangaha.

Ia tom∙aniko ong∙ataniara Kusimkolgre B jolo donggipa a∙arango 1980 bilsirangonin manderang songdong a∙chabae a∙ani nokgipa ong∙na a∙kanganio nanggrikanirangko tom∙tomaona ra∙baatna miksonge chanchirimangaha. Ia biaprango indita bilsirangoni manderang songdongbae an∙tangtangni a∙a ine a∙kangaona sokahanina, pilak neng∙nikanirangko niamo pangchake ja∙kurangko de∙an baksana manderangni nangnikani aro janggi tanganiko nigrike ta∙rake kamrangko ka∙na miksongenga ine Marak aganangaha.