Da·al salni bako West Garo Hills a∙jani Oragitok songo skanggipa changna coffee baganrangko dake cha∙giparangni bading chiwalanio chu∙sokgipa ong∙anina All Garo Hills Multi-Purpose Co-operative Society (AGHMPCS) Babadam, Durama MPCS-ni bakrime MBMA aro Tura Coffee Board-ni dakchakanichi coffee-rangko badinge man∙giminrangoniko on∙gilani program-ko ong∙atangaha.
Ian skanggipa changna coffee baganko dake cha∙giparangna man∙giminoniko on∙gilaniko aro agangolpogrikaniko daknagita program ong·atani ong∙a ine a∙jani DC Jagdish Chelani aganangaha. Jolo indakple coffee-rangko man∙a ka∙donggijanirangko aganan baksana ia jolo 12,000 Kg coffee-rangko man∙aniara jolni ge∙a gamanio tang∙doaniko mesokani ong∙a ineba DC aganangaha. Unbaksana ia kamrango pilak neng∙nikani somoirango an∙tangni dakchakna ku∙si ong∙anikoba DC parakangjolaha.
AGHMPCS a·dok sorkarini tangka paisanigita dakchakanichi jolo manderangni janggi tangani cholko tang∙doatnagita kamrangko ka∙enga ine AGHMPCS, Babadam-ni Director Rev Fr. Sunny Maveli aganangaha. 2022 bilsio Rev Fr. Sunny Durama MPCS-ko bikotdile ua joloniko 1200 Kg coffee-rangko bree Shillong songjinmao pala sim∙anirangko dakaha indiba ua somoio namgipa bosturangko jakkalna man∙jani gimin man∙gnirang dongjaha ine aganangaha. Unbaksana ua somoina skang jolo coffee ge∙e game cha∙giparang gong 15 ba 20 dakesan palna man∙aha ine aganangaha. Indake da∙o ia jolni coffee-rangko bading chiwalanichi bang∙a man∙gnirangko man∙aha aro je man∙giminoniko da∙o jolni coffee-ko ge∙e cha∙giparangna on∙pilskaaniko daknagita man∙aha ineba Rev Fr. Sunny agandapangaha.
Una agreba Tura Coffee Board-ni Md. Sun Muhammad Ali a∙jao Coffee Board-ko kulie dingtang dingtang cholrangchi dakchakna jotton ka∙genchimoba sokdojae co-operative society aro private party-rang baksa nangrime kamko ka∙angskaenga ine aganangaha.
