Bangladesh a·songo so·sojengjeng ong·ani gisepo a·dokni economy-ko tang·dodapatna aro sima ari jolni naljokanina ma·mong sorkarini dakchakaniko am·na miksonganiko Chief Minister Conrad Sangma parakangaha. Iani bidingo batanggimin chango ma·mong-ni Home Minister baksa ua golpogrikon darangkoba sima ari ning·aona napbana on·jawa ine Amit Shah-ni aganchakaniko parakangaha. Badiaba jolrango napsrukbagipani mamlarang donggenchimoba tom·sa dake jinma Bangladesh-oni niamni a·palo napbana man·jawa ine Sangma kobor ra·timgiparangna aganangaha.
Da·o dipet so·sojengjeng ong·anirang a·bachengaoniko toate komiangengaha aro namdaproroengaha. Sima ari jolrango bading chiwalanirangko daktaienga aro iarangan namgipa chinko mesokenga ine Sangma janapangaha. Mikkangchi maming neng·nikanirangko chagrongna nangjaoba simsake dongna nanggen ine Sangma parakangaha.
September 9 tariko Chief Minister Conrad Sangma, GST Council tom·aniona Delhi-ona re·ange Home Minister-ko grongtaigen. Ia somoio ua sima ari jolko bilakdape nirok simsakna project-rangko chamataina memorandum-ko tarie on·angna miksonganiko Sangma talatangaha. Sangma iani bidingo aganengon, sima ari jolko champenganisan gamchataigija manderangna chu·gimik cholrangko on·ani, bading chiwalanirango tang·dodapatani aro rika cho·anirangko namdapataniba namen gamchata ine Sangma agandapangaha.
