Mijal walni bako Mankachar-oni Guwahati-ona sak 31 manderangko gate salangenggipa night bus bolsa AS-01 GC 5044, chi bottle-rangko gapkete ra·angenggipa ML-09 A 8005 truck gari baksa chatinggrike Rongram ramao a·sel ong·aha. Ia obostako chagronganio sak bri manderang adita saknaako man·aha aro uamangko sanna bannaniko dakna Tura Civil hospital-ona ta·raken rimangaha. Iamang sakbrina agre darangba saknaa man·jaha aro gipin gadopagipa manderang night bus bolgipino Guwahati songjinmaona walni somoion songreangtokaha.
Night bus-ko Singimari-oni Siras Ali-ni depante Jahangir Ali salangmitingo ia a·selko chagrongaha jeon name dake sing·sandianiko dakon truck-ko salenggipa Garobadha-oni Bankim Hajong-ni depante Bedinath Hajong-ni dos ong·a ine u·ina man·aha. A·selo ga·akgipa gari bolgnikon police dolrang rakkie donaha aro nambate ma·sina sing·sandianirangko dakangkuenga.
