SWGH Multi Facility Centre Ampati-o National Livestock Mission (NLM)-ni ning·o bang·a scheme-rangko jakkale namgnirangko man·ani bidingo District Level Seminar-ko a·jani Animal Husbandry aro Veterinary department-nigita ong·atangaha. Ia program-o Self Help Groups (SHGs) aro Integrated Village Co-operative Societies (IVCS)-ni member-rang apsan tom·e jila kaanirangko dake janggi tangani cholrangni bidingo chanchirimangaha.
Ia program-o a·jani ADC Dr. R Ch. Marak mongsonggipa sokgipa ong·e tom·aniko oprake, an·tangtango chu·ongagita man·gipa jila kaanirangko jakkale a·jao be·en, dut aro do·chirangko man·anio bariate bading chiwalanio bakko ra·china aganangaha. Uarangkosan ong·aigija SHGs aro IVCS dolni member-rangko je donga bosturangko jakkale cholrangko ra·china aro a·jao jila kaaoniko man·anio dilgipa ong·atna ja·ku de·chinagita Marak didiangaha.
Apsandaken District Animal Husbandry & Veterinary Officer Dr. FGT Sangma NLM-ni mongsonggipa kamrangni bidingo aganengon, jila ka·anirangko dakanio baikamgipa ong·atna, changa sapaniko namdapatna skie ra·na aro ra·donagita ia mission-ni miksonganiko talatangaha. Unbaksana Fishery Officer Grikjang Sunny R. Marak na·tok, do·gep, wakrangko jilani gimin aganangaha aro MBMA-ni Program Associate Tapsry K. Sangma IVCS-ni chu·gimik kamrangni bidingo aganangskaaha.
Bon·kame ia seminar-o a·jao jila kaanirangko namdapatna on·kange kam ka·giparangna aro gisiko nange bakko ra·giparangna Dr. FGT Sangma-ni jakchi Certificate-rangko su·alangjolaha.
