South Garo Hills a∙jao chadambe me∙chik bi∙sako kragija dake video ka∙e social media-rango wate giproroatenganiko niksonagita man∙e ia kamko ka∙giparangni kosako Bharatiya Nyaya Sanhita, 2023 R/W 66E aro Information Technology Act, 2000 ni 67A-o pangchake saksa social activist Jaynie Ningring N. Sangma da·al salo a·jani Superintendent of Police (SP)-o badi ka·angaha.
Ia saksa chadambe me∙chik bi∙sako kragija video-rangko ka∙e social media-rango wate giproroataniara uko kratcha∙atan baksana saksa me∙chikni gunko kal·ake ro∙ani aro niamni apalo ong∙a ine Sangma janapangaha. Iani gisepon video-ko giproroangaoniko champengna aro ra∙gale galchina ta·rake ja∙ku de∙chinagita SP-ko didiangaha.
Indake ong∙enggon ia kamko ka∙gipa sakantini kosako am∙sandianirangko dake dongimin niamrango pangchake kragipa sastirangko on∙chinagitaba Sangma didiangaha.
