Selsella block-ni ning·o ga·akgipa Haldibari-oni Rochonpara re·gipa ramako Public Works Department (PWD)-ni ru·uta bilsirangna tarigija galchipe donanina bakrimgimin NGO dolrang PWD Minister Prestone Tynsong-na chitti seataha. Ia ramani project-o culvert aro dolongrangkoba tariani gnang jeon rama tariangenggipakoba matchotgija ru·utbea bilsirangna galchipe donenga. Rama namgipa dongjani a·selo songdongenggipa manderang, salantio re·ruragiparang, chatro chatrirang, ge·e game aro bading chiwale cha·giparangna namen neng·nikaniko ra·baenga.
Ia ramana ku·rangko on·a FKJGP, ASWA aro GSU bakrime ja·ku de·aha jeon ramako name tarie on·genchimode salantio janggi tanggiparangna aro sakantina dakchakbeani ong·gen ine uamang janapataha. Iani bidingo uamang Prestone Tynsong-na u·iate galchipe donenggipa ia ramako PWD-ni ge·etanichi tarie on·taichina mol·molataha. Ramani obostakoba NGO dolrang jachipchang ra·e PWD Minister-na on·atjolaha aro tarie on·taina ka·dongsoaniko parakate Selsella block-ni manderangna namgniko ra·bachina u·iatangaha.
