Songsak MLA aro Leader of Opposition (LO) Dr. Mukul Sangma, NPP dolchi dilenggipa MDA sorkariko a·dokni Autonomous District Council (ADC)-ko bilgri jakgri ong·e koragita chacha ong·atenganina matnangataha. India-ni constitution baksa ADC-rangni kamtangko ma·gape ka·na man·gijanian manderangni namgniko nikchange re·mikkangani ong·a. Sangma, ia kattarangko ADC-rangni mongsongbate GHADC aro JHADC-o tangka paisarangna neng·nikani bidingo pangchake janapangaha. Uni somoio sorkariko chalaimitingo ADC-rangni nangnikanina bang·a dakchakaniko on·a kam ka·anikoba Sangma janapangjolaha.
Ia neng·nikanirangna baditana kingking Chief Minister ma·mongona chittirangko seataha aro a·dokni officer-rang Delhi songjinmaona re·ange ma·mong sorkarini ADC-rangko nirokatna nangani daitoko u·iataha ine Sangma sing·doangaha. Ma·mongni dakchakna ra·chakaniko a·dok sorkari am·sandie ADC-rango tangka paisarangko ra·bana nanga. Iarangko dakna uamangko sawa aro maina rim·change dongenga ine Sangma sing·dapangaha.
District Council-ni neng·nikanirangko a·dok sorkari olgrokatna man·jaode, ADC-rangara sani bi·sa? Indake ong·genchimode, NPP-chi dilenggipa ADC-rangko uamang bon·atna miksongani gnang ba Distrcit Council-rang namen bilgriaha ine agana man·gen. Manderangni nangnikaniko mikkango done, Indian Constitution-ni Sixth Schedule-ko naljokatna man·agita sakantiko nie dongaigija daitotangko ra·china Mukul Sangma aganangaha. Ian GHADC-na mangmangsan ong·aija, ADC gimikna chanchina nangani ong·enga ineba Sangma agandapangaha.
