A·chik jatni social media-ko namgijana jakkale jatko, Mahari ma·drangko aro songko nokko ong·siatani gimin AHAM Dalu Regional Unit-ni President Cham Cham N. Sangma an·tangni gisiko suk ong·gijaniko parakataha.
Ia chasongo facebook, Instagram reels-rangko kal·engani gisepon jatna aro songsalna namgipa dakmesokanirangko dake kal·e mesokani cholrang bang·bea jekai lekka ki·tap seani, song·na ritna changaniko mesokani, ka·dingatani, chrokmesokani, golpo aganani, koborrangko aganani, ge·a gamani aro dingtang dingtang namnamgipa an·tangtangni changa sapaniko jattangni manderangna dakmesoke social media-rango upload ka·aniko darangba beng·a kangani dongja. Indake ong·engon ia chasongo salsa batbat Facebook, Whatsapp, Instagram-rango A·chik jatrangni kragijagipa ma·manti video-rangko tarianiko aro sel·gijagipa kattarangchi comment ka·anirangkosa niksonagita man·sorongenga ine Sangma janapangaha.
Iarangko nike A·chikrangara kam ka·na arate indakgiparangko dakolame ronasan somoiko jakkalengama ine Sangma sing·doangaha. Iako aganengon pilak A·chik jatko jaksi ote aganenga ong·ja maina mitamrangde kragipa bewalo video tariesa watenganiko niknagita man·enga. Iani gisepon bang·a changon manderangni skatang ku·sik sel·tagija, video sel·tagijarangko wate jatko ong·siatgiparangko songsalo namen ra·chakna man·gijani ong·enga ine Sangma janapangaha. Ia pilakkon nipile mikkangchi reels video-rangko tariengon krabewalo tarichina A·chik sakantiko ku·mongatan baksana mol·molangaha.
