MDA sorkarini tangka sroaniko bariatani a∙selo mikkangchi chotpilna nangani somoio bang∙a neng∙nikanirangko chagrongna nangao ga∙akgen jean a∙dokni namroro silroroaniko cha∙sotaona sokatgen ine Leader of Opposition Dr. Mukul Sangma matnangataha.Tangka ra∙sogimin-ni principal aro interest-ko chotpilna bang∙dape tangka sroaniara namen aiao inmanpila jean sorkarini manderangna togianiko mesoka ine Sangma aganangaha. Indakgipa kamrangan mikkangchi a∙dokna namen neng∙nikaniko ra∙baani ong∙gen jekon batanggipa somoio CAG report-oba janapangaha ineba Sangma raken jegalataha.
2018-19 bilsiniko niatgenchimode ma∙mong sorkariniko tangka sroani nisan dongiminara 3.25% ong∙achim indiomangba a∙gitalo 6.3% ona kingking sokdoaha jean dal∙a dingtanggrikaniko mesoka. 2019-20 bilsio, 4.35% oni 4% na bate tang∙doaniko nikna man∙a. Chingni sorkari rikani somoio 3% san ong∙aia aro 3% na bate maming saloba tangka sroaniko batatja maina Meghalaya Fiscal Responsibility and Budget Management (MFRBM) Act, 2006-o pangchake sorkariba ja∙rikna nanga ine Sangma aganangaha. Unbaksana 2021 bilsina nisanko 5.25% ko donaniara batanggimin somoio 3% dongipaoni name mancha barianiko nikon aiao inmanpilgipa ong∙a maina 5.25% ko nisan donani ja∙manoba 4% ona tang∙onatanikode anga nikmankuja aro 2023 bilsiko niataigenchimode 4% ko donataiaha ine Sangma agandapangaha.
Una agreba NPP dolrangni pekatgipa bostu, koela cho·ani aro contract kamrangniko niamgri tangka paisa gilani bidingo jakgitel ong·e am·sandianiko dakchina Dr. Mukul Sangma ge·etangaha.
Batanggimin somoio Congress-ni President aro Shillong-ni gitcham MP Vincent Pala-ni MLA rangko bregopna NPP dolrangni niamgri tangka paisa man∙giparangko jakkalenga ine agangipa kattana Dr. Mukul Sangma Sombar salo kobor ra∙timgiparangna aganchakaniko dakangaha. Sangma-ni agananigitade, indakgipa matnanganirangko knaon maming dakeba mikkang nitee kamrangko ka∙gija, manderangni aro a∙dokni namgnina kakketgipa ja∙pangko sandina jakgitel ong∙gipa am∙sandianiko dakchongmotna nanga ine aganangaha.
