South West Garo Hills, District Mental Health Program (DMHP), Chengkompara Adolescent Health Resource Centre-o World Suicide Prevention Day-ko “Changing the Narrative on Suicide” katta bichongko done maniangaha. Ia manianiona a·jani bang·a skulrang, sanna bannanio dangdike on·giparang aro songko nokko dilenggiparang sokbatokaha jeon dingtangmancha gisiknigita an·senganina aro an·tangtangko so·ote siani bidingo mikrakaniko on·a program-ko ong·atangaha.
Program-ona a·jani SP Vikash Kumar mongsonggipa ong·e sokbae da·ororo social media-ko jakkale gisikko nosto ka·ani aro chadamberangna simsakna nangani gimin aganangaha. Ia program-ona Purakhasia C&RD Block-ni BDO Dr. A K. Marak, SWGH SEO Tapos Marak, Ampati Civil Hospital-ni Medical Superintendent Dr. Denisha Momin aro M&HO Dr. Samson Sangma, sokbagiparangoni gipinrang ong·a. Unbaksana, Ampati St. Claret Secondary School, Ampati Government Higher Secondary School, Cool Shadow Secondary School, Chengkom Medic Secondary School, aro Mother’s Union Secondary School-ni skigiparang aro chatro chatrirangba bakko ra·angtokaha.
An·tangni janggiko ra·e so·ote sienggiparang batroroenganina ta·rake champengna nanganiko aro ja·pangoni a·bachengbae mental health education-ni gamchataniko Dr. A K. Marak aganangaha. Una agreba, Ampati Civil Hospital-ni Medical Superintendent Dr. Denisha Momin, gisik bilgrie saa a·bachengani ja·pangko talatange an·tangni janggiko ra·ona sokatani gimin aganangskaaha.
Antigimik manianggipa ia Suicide Prevention Week-o, Ampati jolo donggipa bang·a skulrangni bi·sarangna Extempore Speech, Role Play, Poster Making, aro Musical Chair-rangko ong·atangaha jeon bon·kamgipa salo chegipa bi·sarangna boksisrangkoba on·angaha.
