Tura Civil Hospital-o Anaesthetist aro Medical Laboratory Technicians and Technologists (MLTDs)-ni kamrangna ta∙raken rimnapaniko dakchina A·chik Conscious Holistically Integrated Krima (ACHIK) dolrang Health Minister Ampareen Lyngdoh-na chitti see mol·molataha.
Tura Civil Hospital ge∙sa Garo Hills-o sanna bannanio gamchatbegipa sanchakram biap ong·genchimoba anesthesiology-ni a∙bao Medical professional-rang ba sapgiparang chu·ongjani a·selo nangchongmotgipa surgery-ni kamo dangdike on·nagita neng∙nikaniko man·enga. Iani a·selo sagiparang bang∙a changon chelgipa hospitalrangona re∙na nange uamangni somoi aro tangka paisanigitaba neng·nikaniko man·ronga ine ACHIK dolrang janapataha.
Una agreba ia hospital-o gipin jatrangko Medical Laboratory Technicians and Technologists (MLTDs)-ni kamrangna rimnapna chanchiarangkoba knasamsoani gimin MLTD-ni kamna rimnapaniko dakon A∙chik jatko rakkichina Health Minister-ko mol∙molangaha. MLTD-ni kamna jattangko rakkianichi, A∙chik a∙songo songdongenggipa manderangna aro sanna banna re∙bagiparangna kusik dingtanggrikanichi neng∙nikaniko ra∙baaniko champengna man∙gen ine ACHIK dolrang agandapangaha.
Bon∙kame, jolo songdongenggipa manderangna kam tikatna dakchakagita aro kusik agangrikanio maming neng∙nikaniko sokatjanagita Tura Civil Hospital-o Lab Technician-ni kamna gipin jatrangko rimnapjachinaba ACHIK dolrang mol·molangaha.
