North Garo Hills, Bajengdoba C&RD Block-ni ning·o ong·gipa Balmuri songo bolni bijolini krongrangko ra·gale baikamgipa aro mangrakgipa krongrangko songskachina A·chik State Peoples’ Front (ASPF), NGH Bajengdoba MePDCL Sub-Divisional Officer-na janapate mol·molataha. ASPF dolni am·sandianiko dakon bang·a bolni bijolini krongrang namsranggijaniko nikna man·angaha. Ia krongrang gitchambeahaoba bijolirangko salkuengani a·selo manderangna aro matburingnaba namen kenbegnigipa ong·enga ine ASPF dol u·iatangaha.
Songni manderangni changni chang daito gnanggipa aro dilgiparango janapgenchimoba ia simsaksona nangenggipa neng·nikaniko niatna maming ja·kukoba de·jaha. Ia bolni bijolini krongrang namen nosto ong·gimin aro a·selko ra·bagnigipa ong·a jekon saknaa man·aoni naljoksona aro biljoliko dontonggija watna man·agita nirokatna nangchongmotenga ine ASPF dol janapataha. Ian Balmuri songna namgni aro pilak ong·gni a·selrangoniko manderangko naljokatani ong·gen ine uamang aganangaha.
