Tura songjinmao ong·atenggipa 2-gipa Inter-Mahari Womens Football Tournament 2024-ni gnigipa semi final-ko Bolwari aro Chambugong maharini gisepo da·alo P A. Sangma Sports Complex-o kal·angaha.
Ia gnigipa semi-final kal·susaanio Chambugong maharirang kal·a a·bachengaonin bilake kal·anichi Bolwari maharini kosako chu·gimik goal 5 ko chipna man·e chegipa ong·e final-ona sokdoangaha.
Chambugong maharina skanggipa goal-ko Sailalianchi Ch. Marak kal·ani minute 22-o chipaha. Skanggipa goal-ni joljolan minute 24-ni somoio Tengchira Ch. Marak gnigipa goal-ko chipe on·e skanggipa half-o 2-0 chi Chambugong mahari ame dongsoaha. Gnigipa half-ni minute 32 aro 45 somoio Tengchira Ch. Marak goal gniko doltangna chipe on·taina man·e hatrick-ko man·angaha. Bon·kamgipa goal-ko Sailalianchi Ch. Marak Chambugong maharina minute 59-ni somoio chipna man·angskataiaha. Bolwari maharirang rakbee jotton ka·genchimoba goal sa mangmangkoba Chambugong maharini kosako chipna man·angjaha.
Chambugong mahirang ia semifinal-ko cheange 2-gipa Inter Mahari Womens Football Tournament-ni final kal·susaaniko Mangsang mahari baksa re·baenggipa September 21 tariko P A. Sangma Sports Complex-o kal·angskagen.
