Tura constituency-ni MP Saleng Sangma-ko North Eastern Indira Gandhi Regional Institute of Health and Medical Sciences (NEIGRIHMS)-ni Governing Council-o bak ong·na seokangaha. Sangma-ko seokako man·ani ja·mano NEIGRIHMS-ni Director mijal salo rimchaksoe uko grongangaha.
Sangma-ni Director-ko grongeani somoio NEIGRIHMS-o skie on·enggiparang, kam ka·enggiparang aro department-ni dilgiparang baksa tom·e adita chanchirimanirangkoba dakangaha. Ia tom·anio NEIGRIHMS-ni da·o kamrangko ka·enganiko aro mongsonggipa neng·nikanirangko jekai skigiparangni komiani, cadre-rangni kamko nipiltaianio ru·utatani, AIIMS New Delhi aro PGIMER Chandigarh baksa apsan gadango ong·atna nanganirangni bidingo chanchirimangaha.
NEIGRIHMS-o je neng·nikanirangko chagrongenggiparangni bidingo nirokate Northeast jolo damsa nambatgipa ong·atna on·kange kamko ka·angna aganangaha. Unbaksana ia neng·nikanirangoniko naljokatna ma·mong sorkari aro Northeast-ni gipin MP-rang baksa ku·monge kamko ka·anggen ineba ku·chakangaha.
Ia tom·anio NEIGRIHMS-ko Institute of National Importance (INI)-ni gadangnigita bilko on·an baksana chel·aoni sanna bannaniko dakna re·bagiparangna guest house-ko rikna a·a nangdapaniko on·china Prof. Mehta janapangaha. Ia janapgiminrangko mikkango done a·dok sorkari baksa kamko ka·angan baksana nanggipa bosturangko aro samrangko sokatna kamko ka·anggen ineba Sangma ka·dongani kattarangko aganangaha.
Bon·kame Sangma-ni NEIGRIHMS-ona re·bae chanchirimanganina Prof. Mehta mittelan baksana mikkangchi chu·gimik tang·doaniko ra·bana ka·dongsoani kattarangko aganangaha. Una agreba NEIGRIHMS-ni staff aro nursing association-ni palo sokbagiparangkoba Sangma grongangjolaha.
