BJP baksa a·dok sorkariko rikenggipa NPP, GHADC-ni tangkarangko party-tangni nanganina jakkalani a·selo GHADC-ko bon·chongdikataona sokatenga ine Tura-ni MDC aro BJP-ni State Vice-President Bernard N. Marak matnange aganangaha.
GHADC-nigita Garo Hills-ko namroro silroroatna ANVC dolni ma·mong sorkari baksa songgigrikani ja·mano chamatgimin tangkarangko jakkalsrete GHADC-o kam ka·giparangna dormahako chamatgipa gong 50 crore mang tangkako gipin kamrangna jakkalskaani a·selo GHADC-o kam ka·giparangna dormaharangko on·a man·jaenga ine Marak janapatan baksana ian NITI AYOG-ni dongimin niamrangko pe·ani ong·a ine aganangaha.
2014 bilsio Delhi songjinmao, ANVC aro ANVC-B dolrang ma·mong sorkari baksa Agreed Text for Settlement (ATS) ba uamangni dabianiko on·a ku·chakanio pangchake soi ka·grikaha. Ia ku·chakaniara GHADC-ko bilakdapatna miksongani ong·genchimoba batanggimin bilsi 10 o NPP-chi chalaienggipa soi ka·anio pangchakgija project-rangko an·tangtangni jako ra·an baksana project-rangni bidingo ANVC dolrang baksa maming agangolpogrikanirangkoba dakjaha ine Marak aganangaha. Indaken chamatgimin tangkarangko jakkalsretan baksana project-rangko jako ra·drae mitam project-rangkode chu·sokatgija galchipaha ineba Marak aganaha.
Iani gisepon 2014 bilsio ANVC dolrang ma·mong sorkari baksa soi ka·grikani ja·mano, Garo Hills-ko chu·gimik tang·doatnagita 2015-16 bilsio dingtangmancha GHADC gong 100.71 crore tangkarangko man·soaha. Iana agreba GHADC-na da·onaba tangkarangko chamatkuenga jekon GHADC-ni Rural Local Bodies (RLB) aro Urban Local Bodies (ULB)-rangna jakkalna chamatgipa tangkarangko NPP-chi dilenggipa Executive Committee-rang bang·batakon jakkalsretaha aro NPP-ko Manipur, Arunachal aro gipin a·dokrango gipatna jakkalaha ineba Marak u·iatangaha.
Iarangni a·selo NPP-chi dilenggipa Executive Committee kamrangko ka·e matchotani report-ko mesokna man·jani a·selosa da·onaba Utilisation Certificate (UC) ko ma·mong sorkariona sokatna man·kujaenga ine Marak janapangaha. Unbaksana chu·gimik 100.71 crore tangkarangni dal·dalgipa project-rangko CM an·tangni manderangna rim·kepe donaha jekon bilsi 8 ong·piloba matchotatna man·kujaenga ine Marak aganangaha.
Una agreba party-ni Finance Secretary-na Council Museum-ko award on·ani ja·manoba da·ona kingkingba bimang ong·kujaenga. Unbaksana project-rangko dakjeanirangba gnang aro 40 percent-nigita council treasury-na ma·mong sorkarini chamatgipa gimachipaha ine u·iatangaha. Council-o da·alo tangka paisanigita neng·nikaniara NPP-chi dilenggipa EC ni dilani a·sel ong·enga ine Tura-ni MDC Bernard Marak matnangataha.
