Re·baenggipa October 2 tariko Shillong songjinmao ” Gau Dhwaj” matchu-ko a·songni ma·gipa ba “Mother of the Nation” ine Hindu toromni saksa niksenggipa dilgipa Shankaracharya Avimukteshwarandah jinmana parakatna re·jomaniko dakdilanggen ine u·iatangaha. Unbaksana Gau Dhwaj Sthapana Bharat Yatra-ko a·song gimikon matchuko chel·chake aro naljoke rakkianiko dakanggen ineba aganangaha.
Da·al salo Shillong Press Club (SPC)-o Press Conference-ko ong·atna dongimin salko Hynniewtrep Youth Council (HYC) dolrangni ong·atchakram biapni a·palo jingjengataniko dakenganina Hindu dolrang dontongataha. Iako dontongatna nanganiara Press Club-rangni program-ko dakchina see on·ani bilko man·jani a·selosa ong·aha ine Yogiraj Shailendra aganangaha. Uamang changgitam mangna baten press conference-ko ong·atna Shillong Press Club-o mol·molgenchimoba maming aganchakaniko man·sojaha ineba aganangaha.
Hindu toromko dilgipa Shankaracharya Avimukteshwarandah, Shillong songjinmaona October 1 tarikni attamchipak sokbae salgipinon Gau Dhwaj-na tarisamsoaniko re·ange nirokenba Gau Mahasabha-ni bidingo West Bengal-ona re·angna skang aganprakaniko dakanggen ine talatangaha. Gau Dhwaj Sthapana Bharat Yatra-ko September 22-oni a·bachengate matchurangko chel·chake rakkiani gimin mikrakatanirangko on·anggen jean “Rashtra Mata” (Mother of the Nation) ine pangchake done ong·atanggen ineba aganangaha.
A·song gimikon ia yatra-ko ja·rike Gau Pratishtra Mahasammelan-ko November 7-oni 9 tarikona Delhi-o Gopashtami nangrime ong·atange matchu-ko so·otaniko bon·ate a·songni ma·gipa (Rastra Mata) ine dona ma·mong sorkario mol·molaniko dakanggen ineba aganangaha.
