West Garo Hills Tikrikilla-ni Pedaldoba jolo mongma bi∙sani manggisiko mi ge∙a pattaloniko songni manderang uamangni kam ka∙na ong∙katmiting somoio da·al pringo nikaha ine u∙iatangaha. Ia mongma bi∙sani siani ja∙pangara bijoli nangani a∙sel ong∙naba donga ine janapangaha jekon Assam aro Pedaldoba-ni sima ari jolniko man∙aha.
Ia ong∙gipa a∙selko songni manderangni nikeani ja∙mano Garo Hills aro Assam-ni Wildlife official-rangna u∙iatangaha. Unbaksana ia biapara adita bilsirangna mongmarangni re∙ronggipa rama ong∙a jekon da∙o mi ge∙na jakkalenga ineba janapangaha.
Northeast gimiko mongma jelbatgipa aro mongmarangni a∙sel ong∙batgipa biaprangoni Assam a∙dok ong∙a. Mongmarangni ge∙a gamako nosto ka∙aoniko naljokatna game cha∙giparang bijoli silitingrangko uamangni game cha∙gipa biaprango songronga aro ia dakbewalrang niamni a∙palo ong∙genchimoba daito donggipa dilgiparang uamangko champengnagita man∙rongja ineba parakataha.
