Re·baenggipa October 2 tariko Shillong songjinmao matchu-ko a·songni ma·gipa ba “Mother of the Nation” ine Hindu toromko dilgiparangni re·jomna miksonganiko a∙dok sorkari champengjagenchimode Thma U Rangli Juki (TUR) dolrang matchu be∙enchin picnic cha·aniko ong∙atanggen ine parakataha. Ia picnic-ko ‘Gau Dhwaj’ ba matchuni flag-ko songna am·gipa biapon ong∙atskagen ineba uamang u∙iatangaha.
Hindu toromni ge∙sa dol Bramachari Mukundanand jean Jagatguru Shankaracharya Swami Avimukteshwarananda Saraswati of Jyotirmath Gau Dhwaj Sthapana-ni palo Bharat Yatra-ko a·song gimikon matchuko chel·chake aro naljoke rakkianiko dakangna tik ka∙angaha. Uamangni ia ja∙kuko de∙aniara India aro Meghalaya a∙doko cha∙ani bewalrangko champengna miksongani ong∙a aro matchu doke cha∙aniko bon·atna kam ka∙gipasa ong∙a ine TUR-ni dilgipa Angela Rangad aganange raken jegalangaha.
Indake matchurangko Hindu toromko dilgiparangni naljoke rakkina ja∙ku de∙ani aro matchu-ni flag-ko songna am·aniara gipin toromko onchepanisan ong∙aigija India a∙songo torom dal∙batsranggipani bilko mesokna am·enganiba ong∙a ine Rangad agandapangaha.
