GHADC-o ong·enggipa obostarangko niate BJP party-ni dilgipa aro Tura-ni MDC Bernard Marak, NPP dolrang council-o kam ka·giparangna uamangni ku·mitchetgiminko on·a man·jaode BJP dolna dilna on·skachina aganangaha. NPP dolrang 2018 bilsioni 5th pay commission-ni dormaharangko on·a parakataonin da·ona kingking ku·chakatangko on·kujaenga.
Batanggimin chango NPP dolchi dilanggipa Executive Committee 2018 bilsionin batesa 4th pay commission-ni ning·o dormaharangko on·e cha·bokbaaha ine Marak parakangaha. GHADC-ni tangka paisana neng·nikanirangoni naljokatna BJP dolsan bil gnanggipa ong·a ine Marak janapangaha.
Bang·a changon NPP dol GHADC-ko bilsokgijagipa dake ma·mong sorkarina mesokna jotton ka·aha. NPP dolni bang·a dilgiparangni ma·mongna chitti seatgipa sakkirang uno gnang ine Marak janapangaha. BJP dolna dilna on·anichi GHADC-ko ja 6 ni gisepo bilakdapatna, tom·tomatna aro tangchapilatna man·gen ine Marak agandapangaha.
