Re·baenggipa October 2 tariko Hindu toromko dilgiparangni Gau Dhwaj Sthapana Bharat Yatra-ko Shillong songjinmao ong·atna hukumko bi·enganiko on·jachina Voice of People’s Party (VPP)-rang a·dok sorkariko didiangaha.
Chief Minister-na on·atgipa chittio VPP-ni General Secretary aro Shillong-ni MP Dr. Ricky AJ Syngkon-ni janapatanigitade, Meghalaya a·dokni manderangni naljokani, tom·tomani aro bakrime dongengani gisepon indake Hindu toromni yatra ba re·jomanirangko ong·atna miksonganirangko beng·na sorkarini skanggipa kam ong·a ine janapataha. Unbaksana fundamental right-o sakantian je toromoba bebe ra·na bil gnanganiko janapate, a·doko toromnigita tom·tom jakgitel ong·e dongengani gisepon indakgipa yatra-ko ong·ataniara golmal gondogolona sokatani ong·gen ine Syngkon janapataha.
Indake a·doko toromko jakgitele bebe ra·ani gisepon je toroman maiko cha·na nanga, maidake janggitangna nanga aro sano bebe ra·na nangarangko agananiara mikkangchi songsalna kenchaksoani ong·enga. Apsandaken je kaman dingtang dingtang jatrangni gisepo so·sojengjeng ong·aniko ra·banasigipako simsaksoe raken jegalsona nanga ineba Syngkon aganangaha.Ia re·jomaniko ong·ataniara a·dokni jatrangni gisepgriko bak ong·atani ba kajia golmalona sokatan baksana songsalo dakbewal rikbewalko mande ra·gijani ong·gen ine Syngkon agandapangaha.
