Re·baenggipa Gambegre by-election-o National People’s Party (NPP) aro Trinamool Congress (TMC) dolgnini gisepo mongsonggipa susaani ong·gen ine Rakkam Sangma uni niksamsoaniko kobor ra∙timgiparangna parakataha. Sangma-ni agananigitade uni election-na campaign ka·ani somoio Gambegre Constituency-ni ning∙o songdonggenggipa manderangni NPP dolna chakpae aganchakanirangko knaani ja∙mano aganangaha.
Batanggimin salrango Gambegre Constituency-ko Congress-ni dilgipa Saleng Sangma dilanggenchimoba Congress doloni sakgittam MLA-rang NPP baksa bakrimeani ja∙mano bilgriata man·ani a·selo Congress dolrang mikkangchi maming dakeba bil dongjaha ine Sangma aganangaha. Da·o dipet NPP dolrang chu∙gimik bil gnange dongengani gimin Gambegre by-election-oba gipin dolrangna bate nambate susana man∙e chena ka∙dongsoenga ine Rakkam Sangma aganangaha.
