North Eeastern Hills University (NEHU), Tura campus-ni Conference Hall-o Research & Development (R&D) Cell-nigita 2 gipa Anusandhan program-ko NEHU, Shillong-ni Vice Chancellor P. S. Shukla mongsonggipa sokgipa ong·e da·al salni bako oprake on·angaha. Ia program-ko chadamberangna bidani a·bao dingtang dingtang chanchianirangko ra·bae agangolpogrike uamangna ka·donganiko on·a aro bidako skie ra·chinagita didina miksonge ong·atangaha.
Ia tom·anio NEHU, Tura Campus-ni Director Sujata Gurudev, NEHU, Shillong Zoology Department-ni Prof. Timir Tripathi, R&D Cell-ni Director Prof. S. R. Joshi, Tura NEHU campus-ni Organising Secretary Dr. Madhukar Gampala aro Dr. Sunildro L. S. Akoijam, Academy-ni gipin member-rang, Head of Department-rang, Research Scholar-rang aro chatro chatrirang bakko ra·angaha.
Tom·anio NEHU, Shillong-ni Vice Chancellor P S Shukla chatro chatrirangna Degree poraianiara saksani chubata gadangona sokdona bil amaniko mesokani ong·an baksana National Education Policy (NEP) 2020-ko ra·gatanio songsalna aro gipin dingtang dingtang silroro namroroani cholrangko ra·baani ong·a ine aganangaha. Apsandaken Anusandhan National Research Foundation (ANRF)-ni gimin aganengon, ANRF tangka paisarangko chamate pilak University aro collge-rangchi re·roroe am·sandianirangko dake India a·songni dal·roro silroroanina aro daka rikanirangko ripingna ja·ku de·ani ong·a ineba Shukla aganangaha. Unbaksana a·songko dal·roro silroroatna research scholar aro chatro chatrirangna nama skanirangko on·e didian baksana skigiparangko uamangna bilsi anti ia program-ko ong·atchinagita didiangaha.
Tura NEHU Campus-ni Director Sujata Gurudev Research & Development-ni gamchatgipa adita namgipa cholrangni gimin aganengon, uni nikanio a·gilsako akkal karap ong·ani somoirang sokbaengani bidingo agane ia neng·nikanirangoni naljoknagita am·sandianichisan bil ama ine talatangaha. Una agreba Shillong NEHU R&D cell-ni director S R Joshi, Tura NEHU Zoology Department-ni professor Timir Tripathi, aro gipin Professor-rangba ia program-ni miksongani aro namgipa cholrangni bidingo aganangaha.
