Re·baenggipa salrango ong·nasienggipa Ranji Trophy 2024-25 ni skanggipa aro gnigipa chango kal·na Meghalaya Cricket Association (MCA)-ni Senior Men’s Selection Committee sak 12 kal·nagiparang baksa sak 5 standby-rangko seokangaha. Meghalaya dol, Plate Group 2023-24 o Hyderabad baksa kal·e runners-up gadangona sokdoange ia chango Elite Group-ona gadoangaha. Meghalaya dolrang skanggipa kal·aniko a·doktangona re·bana skang October 11-oni 14 tarikona kal·ange October 18-oni 21 tarikona Shillong songjinmao Tripura baksa kal·angskagen.
Ia chango adita dingtanganirangsan gnang jekon July jao sak 30 kal·giparangko biming nakatatani ja·mano simsake chanchiesa seokangna man·aha.
Meghalaya dolna changgni kal·anio sak 12 seokako man·giparangara Aryan Borah, Akash Kumar Choudhary, Arpit Bhatewara, Bamanbha Shangpliang, Bijon Dey, Chengkam Sangma, Dippu Sangma, Jaskirat Singh Sachdeva, Kishan Lyngdoh, Ram Gurung, Roshan Warbah aro Swarajeet Das ong·a. Sak 5 standby-o Adarsh Joshi, Anish Charak, Lerry G Sangma, Shembhalang Pyngrope aro Yogesh Tiwari-ko seokangskaaha.
Meghalaya dolko Prabhakar Bairgond head coach ong·e dilanggen, unbaksa dakchake on·giparang Moisten Ch. Marak (assistant coach), Surojit Biswas (physio), Vikash Singh Chauhan (trainer) aro Dister Marbaniang (manager) ko MCA seokangaha. Seoka man·gipa kal·giparang aro dilnagiparang October 8 tariko kal·susaanio bako ra·na skang tarisamsoanigita Cuttack camp-o donge ranta ka·anirangko dakanggen.
