GHADC-o kam ka·enggiparangni ru·uta salrangna 5th pay commission-nigita dormaharangko on·china Govt. college kal·chakramo jingjengataniko bon·kame knachakaha ine Tura-ni MDC Bernard Marak parakataha. Ia 5th pay commision-ko batanggimin NPP-ni EC aro da·o chalaienggipa EC pilak neng·nikanirangko daito ra·e ra·chakmangimin ong·a ine Marak janapangaha.
Ia nambegipa ja·kuko de·e chu·sokatanina CEM aro uni Executive Committee dolko Marak mittelpilani kattarangkoba aganangan baksana ian seokako man·gimin member-rangni councilna aro kam ka·enggiparangni namgnina dangdike on·a nangchongmotani ong·a ineba Marak aganangaha. Unbaksana ia 5th pay commission-ko ra·gatanichi GHADC-na rakbegipa kam ong·genchimoba bakrime kamrangko ka·anichi ia neng·nikanirangko naljoke chu·sokatna amgen ine Marak janapangaha.
Iani gisepon GHADC-o neng·nikanirangko chagrongenganiko NPP dolsande naljokatna amjawa maina ma·mong sorkariko BJP dolchisa dilenga. Una agreba ma·mong baksa ANVC dolni tik ka·e soi ka·grikanio pangchake kamrangko ka·aosa a·doko ADC-rangko bilakatna amgen ine Marak agandapangaha.
