Tura songjimaoni adita chel·ao donggipa chong·motan Durabanda songni sepang jolni Bandari dareo da·al salni bako BSF sipai saksa chio napsrime siaha. Sianggipa Sub Inspector JE (electrical) Suman Kumar Sona, Tura Dobasipara SHQ-oni uni ka·rimska baksa re·ange ia a·selko chagrongaha. Durabanda song, South Garo Hills a·jani Sangknigre pulis thanani ning·ao ga·aka jean Dobasipara camp-oni km 25 mang chel·ao ong·a.
Ia a·sel pringni 9 bajimango ong·aha jeon sianggipa BSF sipai bandari dareo chokone auenba nadona man·gija dongaha ine parakataha. Uni ripeng ska Sumit Singh, ia a·sel ong·aniko mikrontangchi nike kenjagoke sandibeoba saksan bil amsokjae man·jaha. Koborrangko man·soani ja·mano BSF sipairang a·damona Tura pulis aro rescue dol baksa bakan re·ange sandianiko dakangaha. Indake, songni manderangni dakchakanichi aro krenge salgimik sandibeani ja·manosa manggisiko attampango man·aha.
Ian Bandari dareo re·anggipa bilsiko ra·e gnigipa changna napsrime siani ong·a. Batanggimin somoioba college-ni chatro saksa apsan daken Bandare dareo auenba napsrime janggitangko gimaatangaha.
