Ma·mongo cabinet-ni ‘one nation, one election’ ko ra·chakaniko Meghalaya Assembly Speaker Thomas A. Sangma namnikpaaniko parakangaha. India a·song dal·begipa ong·ani gimin manderang jelbea aro bang·a election-rangko bilsirikitan ong·atna nangenga. Election-o bil jak aro tangka paisarangko jakkalani bidingo ua janapange, ian name chanchie tik ka·gimin aro jakkaltonagipa ong·a ine Sangma aganangaha.
One nation one election-ko ra·gatani bidingo manderangni chanchianikoba u·ie ra·na nanggen aro politics-ni a·bao maikai kam ka·a senge nichengna nanggen. Manderangni chanchianiko ma·sigijade dilgipa ong·e da·o agana man·ja. Ma·mongo manderang party ge·sanko bilakatna pu·onronga, indake ong·genchimoba a·doktangode an·tangtangni namnikatang ba chanchiao pangchakesa pu·ontoka ine Sangma parakangaha.
Iani bidingo India a·song gimiko bang·a Congress dolni dilgiparangan BJP-ni kosako matnangate an·tangtangni kamtang namgijako aro chu·sokgijaniko donuna dakenggipa ine aganangskaaha. Apsandaken, a·dokni Congress dolba ia ja·kuko dakam dakduenggipasa ine aganangaha. A·dokni TMC dol, ‘one nation, one election’ ko namnike nangchongmotenggipa ong·aniko parakangaha jeon UDP dolde agana jechake, talatna skang chanchina nanganiko u·iataha.
