Meghalaya Cricket Association (MCA), U-19 me∙asa dolrangna ong∙atnasienggipa 2024-25 Vinoo Mankad Trophy (50 overs) tournament-na kal∙giparangko seokangaha. Ia trophy na kal∙nasienggiparang Assam a·dokni Jagiroad-o camp donggipao an∙tangtangko tarisamsoe ranta ka·anirangko dakenga jeon uamang October 1 tariko Cuttack-ona tournament-ko kal·na re∙ongkatanggen.
Meghalaya U-19 me∙asa dolna seoka man∙giparangara Apandanka R. Marak, Aashish Kumar Lohar, Angkit Tamang, Dipayan Nandi, Gaurav Jyoti Thakuria, Heiyomiki Ryngkhlem, Jarrett M. Wanniang, Kshitij Singghania, Manthan Dey, Pushkar Raj Singh, Rudra Singh Rathore, Shubham Raseilly, Salchang Sangma aro Shavian Blah ong·a. Standby-o Grish Raj Ray, Chengsrang S. Marak, Manthan Gupta aro Gaurav Narleng seoka man·angaha.
U-19 me·asa dolko Head Coach ong·e Sandipan Deb Nath dilanggen jeon Assistant Coach Shiva R. Sangma, Physiotherapist Hamboy Langbang, Trainer Gregory G Syiemlieh aro Manager Prewindson D. Sangma, iamangko dakchake on·agipa staff dake donataha.
Re∙baenggipa October 4 tariko Meghalaya dol Baroda baksa su∙saangen, October 6 tariko Bengal, October 8 tariko Assam, October 10 tariko Karnataka aro October 12 tariko Maharashtra baksa susaangskagen. Ia chango, re·anggipa U-19 dolo kal·gipa bang·bataan 2024-25 o kal·taipilna seoka man·aha aro mija bilsio U-16 category-o name kal·gipa chadamberangkoba ia bilsini U-19 Meghalaya dolo kal·na seokangaha.
