Jengjal Sub Divisional Hospital-o sanna bannaniko dakani bidingo simsakgijanina matnanganiko Health Department u·iani ja·mano am·sandianiko dake name ma·sikuja dipet darang kam ka·gipani kosako koborrangko ong·gija gatatpajachina Health & Family Welfare Department-ni Principal Secretary Sampath Kumar mol·molataha. A·selko chagronggipa nokdangoni maming badi ka·aniko dakjahaoba Directorate of Health Service (Maternal Child Health & Family Welfare)-oniko nanggipa aganchakanirangko department am·sandienga ine Kumar u·iatangaha.
Indake ong·genchimoba ma·sianigitade ua mandeko 2024 January jao saa bilongako Jengjal Sub Divisional Hospital-ona rimbaon kam ka·giparang namen sanna bannaniko dake janggiko naljokataha. Re·anggipa bilsigni atani gisepo hospital-o kam ka·giparang krenge dangdike on·e bang·a janggirangko jokataniko mongsongbate me·chik aro bi·sarangko naljokataniko Health & Family Welfare department ma·sia ine Kumar aganangaha. Iani gisepon nanggipa am·sandianirangko dake name talkuja dipet kam ka·giparangni kosako ma·sichenggija ong·gija kattarangko jangatpajachina Kumar mol·molangaha.
Indake kakket obostako talchenggija matnangatanichi, sanna bannaniko on·enggipa kam ka·giparangna namgija bimungko ra·baani ong·gen aro am·sandianiko dake u·iani ja·mano daito gnanggipasa kraa ja·kuko de·na bil man·a ine Kumar agandapangaha.