Mijal salo a·dokni Animal Husbandry aro Veterinary Department baksa Red FM Shillong nangrime roadshow ba ramao dakmesokaniko Ampati antidamo ong·atangaha. Ia awareness campaign-ko ong·atani miksonganiara re·baenggipa 21st Livestock Census jekon mongsongbate noko jillenggipa matburingrangko sabisioni naljoke rakkina somoigita biji su·ani gamchatani bidingo ong·atangaha.
Ia program-ko Red FM Shillong-ni saksa mingsinggipa RJ Zack dakdilangaha. Program-ko ong·atanichi bang·a songdongenggipa manderang aro bading chiwale cha·giparangni gisiko nanganiko nikna man·angaha. Ia somoini bako RJ Zack agangolpogrikaniko Dr. Bannie Balsrang M. Sangma , Dr. Dayana D. Sangma, aro Dr. Makeda B. Sangma baksa Rabies, Foot and Mouth Disease (FMD), Brucellosis, Classical Swine Fever aro Peste des Petitis Ruminants (PPR) sabisirangni gimin golpogrikaniko dakangaha.
Mikkarang jimbee wagenchimoba ia roadshow-ko ong·ataniona bang·a manderang re·bae quiz susaaniko ong·atgipao bak ra·aniko nikangna man·angaha. Program-ona re·bagiparangna rabies sabisina mikrakratanigita chonbegipa ki·taprangkoba su·ale on·angjolaha.
Unbaksana, official-rang dingtangmancha 21st Livestock Census-ni gamchatani bidingo manderangna agantalate on·aba cholko ra·angaha. Uamang nokni nokgipa aro songni dilgiparangko ia census-o bimchipe bakko ra·china didiangaha. Ia roadshow-ko ong·ataniara department-nigita manderangna mikrakataniko on·a aro mikkangchi a·dokni pilak biaprangon jilla ka·anirangko simsak niroke rakkina miksonge ong·atangaha.
