North Garo Hills a·jao donggipa SSA-ni ning·o man·gipa Waramgre L. P school-na skigipako nangdapengani bidingo saksa Social activist Cherian Momin, Education Minister Rakkam A. Sangma-na chittiko sedoataha.
Waramgre L. P school-ni sakgni skigiparangoni 2019 bilsio saksa siangani ja·mano dongrikenggipa skigipa school-ni pilak kamrangko maming dakchakanirangko man·jae saksan chilgopna nange neng·nikanirangko man·enga. Right to Education (RTE), chong·motan, school-o skia poraiani aro minggipin kamrangko name chalaina chu·ongagita staff-rangko dona on·gimin niamrangni a·palo ong·enga ine Momin parakataha.
Saksa skigipa apsan somoion school-ni pilak nanga kamrangko ka·na aro subject-rangko skina nangani daitoko name ra·na man·ja. School-o staff-rang chu·onggijanichi bi·sarangni skia poraiani a·bao aro chu·gimik tang·doanio ja·manchakaniko ra·baenga. Ian poraia skianio namgipa gadangko ra·bana RTE-ni dongimin ja·pangko rusiaona sokatenga ine Momin chittio janapataha.
Ia gimik obostarangko niate skigipako Waramgre L. P school-o watdapatna man·ode skia poraiani gadangko namdatna man·gen ine Momin janapataha. Indake dakanichi RTE-o dongimin niamko ja·rikan baksana apsangrik ong·e sakanti bi·sarangna mongsongbate songadam aro galchipgipa biaprango bidako on·anio a·dok sorkarini kam ka·aniko namdapatna man·gen. Iasan ong·aigija, da·o ka·enggipa saksa kamkam skigipani kam gimikko chilgopanikoba ritchengatani aro bi·sarangni chu·sokaninaba nambate somoirangko on·a man·gen ine Momin parakataha.
