Songjinmarango manderangko salrurana jakkalgipa jekai Rapido, Uber aro Ola App-gita dakgipa apsan App chong·motan RE·NAKA app-ko GHADC-ni Deputy CEM, Nikman Ch. Marak aro Forest EM, Ashahel D. Shira, chang 155-gipa Garo Hills Day-ko manie gisik ra·na skang oprake on·angaha. Ian Viksit Bharat-ni project ong·a jekon Tura-ni MDC Bernard N. Marak uni sapgipa chadambe programmer aro coder dolrang baksa kam ka·angaha.
RE·NAKA-ko a·bachengatanichi GHADC-ni transport department-ko bilakdapatani aro council-na kajina man·dapani cholrang ong·gen. Ia app AI coded ong·a jean songjinmani chadamberangna ka·e cha·na kamrangko bikotaniba ong·a. Ian GPS-chi chalainagipa App ong·a jeon je biaponiba gadona ba book ka·na man·gen aro pilak sale donenggiparang officially record ong·gen.
RE·NAKA service-ko, chakka ronggitam aro chakka ronggnigiparangna registration-rangko dakuengani gimin October jani skanggipa antio a·bachengatna tik ka·enga. Tura songjinmani Autorickshaw Association aro gipin unit-rangba iana bakrimaniko on·enga jeon online booking system jekai salna re·angani, sale donani aro bosturangko ra·rurae donani kamkoba ka·anggen.
Iano manderangni nangnikagita je somoioba songjinma jolo sale on·a me·a aro me·chik sale on·giparangko seokna cholrangko on·gen. Songjimaosan ong·aigija songadam nokadanrangoba iako a·bachengatna tik ka·enga. Indake dakanichi chatro chatrirangnaba re·rurana namgniko ra·bagen aro jemangan dikdiksana ka·e kamaina sikgiparangde ia App-nigita sale cha·naba cholko man·gen.
