West Garo Hills police dolrang Bangladesh a·songoni sakbri manderangko Tura-oni Paikan-ona re·angmiting somoio Jengjal-o rim·rikna man·aha. Jengjal thana mikkango police dolrangni salantio nirikirongagita daitotangko ka·engmitingo iamang sakbriko mande salgipa garioniko rim·aha.
Police dolrangni sing·on uamang nanggipa lekka pancharangko on·a man·jaha aro name sing·rikianiko dakani ja·mano an·tangtangko Bangladesh-oni ine ku·chakaha. Uamangoniko India aro Bangladesh a·songni tangka paisarangkoba man·aha. Police-rangni agananigitade, uamang Assam a·dokona re·ange India-ni gipin dal·dalgipa songjinmarangona rika cho·ani kamrangko ka·na re·angenga ine parakataha.
Rim·a man·gipa Bangladesh-ni manderangko Md Bilal Ali (18), Md Imani Ali (21), Md Ibrahim Ali (28) aro Md Nasirul Islam ong·a ine u·ina man·aha.
