Rongram C&RD Block-ni ning·o man·gipa Selbalgre songo Plastic Waste Management (PWM) Unit-ko, WGH Tura SDO (Sardar) Manish Kumar, Rongram C&RD Block-ni BDO, Cherime Sangma, SE Ambrose D. Sangma, Line Department-ni official-rang aro songni manderangni dongpaanio Meghalaya Legislative Assembly-ni Speaker Thomas A. Sangma oprake on·angaha. Da·al salo PWM Unit-ko oprake on·angan baksana Swachh Bharat Diwas-koba maniangjolaha. Ian Garo Hills-ni skanggipa PWM Unit ong·a.
Thomas A. Sangma, sokbagiparangna aganengon Garo Hills-ni songa nokadamrangni rongtal an·talbate donganiko gipinrang baksa toe aganangaha. Indake ong·genchimoba plastic-oniko altuae tarigimin bosturangko jakkalanichi aro chasong gitalko ja·rikanichi wilwilao donggipa biaprangko nosto ka·aniko ua janapangaha. Unbaksana, manderangni simsakgija jabolrangko galanichi sojronggipa aro sojronggijagipa bosturangko ma·ekatani somoio kam ka·giparangni neng·nikaniko man·ani bidingoba ua janape sokbagiparangko jabolrangko ma·eke galchina didiangaha. Ia PWM Unit-ko a·bachengate on·anichi jabolrangko chimongna, kam ka·ani bewal aro nama cholo jakkalpiltaina tarina man·gen ineba ua aganangaha.
SE (PHE) cum Member Secretary, DSBMG, West Garo Hills, Tura-ni Ambrose D. Sangma, Swachhata Hi Sewa Campaign-ni a·bachenganiko aro miksonganiko aganangaha. Manish Kumar SDO (Sardar), West Garo Hills Tura, Block Development Officer, Rongram C&RD Block, Cherime Sangma, Mawmluh Cherra Cements Limited (MCCL)-ni Vice-Chairman aro President NPYF Dabo M. Marak, District Coordinator, SBMG, Block Coordinator, SBMG, Selsella Block Debanan R Marak, iamangba tom·ani bako aganangaha.
