Mijal waloni dontonggija mikka waanganichi Garo Hills-ni bang·a bakrango chirang dal·ange, a·arang rurongdapani a·selo manderangni nok jamrang aro gamjinrang rusiatako man·angaha.
Dalu Koinadubi songo a·arangni rangsan rurongdapani a·selo bilsi 57 ong·gipa Santa N Marak an·tangni janggiko gimaatna nangaha aro bilsi 28 ong·gipa demechikgipa Moralistic N Marak-ko bilongbee saknaaniko man·anina Dalu, Community Health Centre (CHC) ona sanna bannaniko dakna ra·angaha. Ia a·sel ong·miting somoio uamang maningsa babilsio kamrangko ka·engachim ine u·iataha.
Dingtang dingtang biaprango a·arang ru·rongdapaha, rama jal·angrang be·wakangaha, jila ka·anirang aro ge·a gamanirang nosto ong·aha. Ia chang mikka jimbeanichi chibima chiringrang namen dal·anganichi Dalu Kujikora songni dollongko chi ta·rakbeani a·sel pe·angaha.
Badiaba songrango an·tangtangni janggirangna ken·begnigipa ong·ani a·selo nok jamrangko gale kate chakaona sokaha.
