West Garo Hills Dalu Sonagre rama bibrao chi dal·anio gari bolsa napsrimgipako mijal salo State Disaster Response Force (SDRF) dolrang nike saldoaha ine u·iatangaha.
Ia obostao jangnanggipa gari ara Wagon R, WB 06 7718 ong·a jeon paningsa dongachim aro chi ta·rakbeani a·sel gariko man·pakangaha.
SDRF dolrangni am·sandianiko dakon pagipani manggisiko da·al pring 10:19 somoio man·aha aro depantegipako pring 10:48 somoio man·skaaha ine u·iatangaha. Uamangni garioniko ID card rangko man·aha jeon a·selo jangnanggipa pagipako Bijoy S Sangma (bilsi 44) ine u·ina man·aha jean skigipani kamko ka·gipa ong·achim aro uni depantegipara class VI-o poraigipa bi·sa Wian Chigado R Marak (bilsi 13) jean Tura Rongkhon Songgital-ni ong·a.
Nikrikgipa manderangni agananigitade uamang paningsa Gasuapara jolni Nagrajora-Sempara oni Tura-ona re·angmiting somoio Bugai RCC dollong sepango donggipa Sonagre songni ramao chi rang·san dal·ani a·sel gariko man·pakangaha ine u·iatangaha.
