West Garo Hills, Karonggre-o a·a rurongdapa man·e sianggipa bilsi 18 ong·gipa Sanira Marak aro Dalu Sorokpara songni bilsi 5 ong·gipa me·a bi·sa Miando P. Marak-ni nokdangrangko gronge Chief Minister Conrad Sangma, lakh 4 prak ex-gratia ko dongrikenggipa ma·aparangna pakwatangaha.
Indake rang·san a·selo ga·ake nokdangni manderangko gimaatna nangao sokanina Chief Minister Sangma uamangni duk baksa kal·imangpaaha. Ua da·al salo Deputy Chief Minister Sniawbhalang Dhar, Dalu MLA Brening Sangma, Dalu BDO aro gipin official-rang baksa a·selo ga·akgipa nokdangrangona re·ange gronganiko dakenga. Ia somoio ua janggirangko gimaatgipa nokdangrangna ex-gratia ni tangka paisarangkoba on·angjolgen.
Garo Hills gimiko mikkarang jimbeanichi aro chirang dal·angani a·selo chu·gimik sak 17 janggirang nasie gimaaha.
