West Garo Hills a·jani dingtang dingtang biaprango Garo Hills Autonomous District Council (GHADC)-oni maming pangchakani lekkarang donggija a·arangko cho·e Assam a·dokchina salangenganina aro itta batarangko niamni a·palo kulienganiko janpate A·chik Dedicated Integrity Leaders (ADIL) dolrang Deputy CEM Nikman Ch. Marak-ko nirokatchina chitti sedoataha.
Ia niamgri a·a cho·anirangko aro itta batarangko kulianiko a·kawe jolrango mongsongbate Rajabala, Phulbari, Chibinang, Bamundanga, Nidanpur aro Tikrikilla-rango niknagita man·enga ine ADIL dolrang u·iataha. Indake niamgri kakketgipa lekka pancharang donggija A·chik a·songni bolrangko den·rimrime ittarangko so·anirangko GHADC Department-oni am·sandianiko dake dontongatchina ADIL dolrang mol·molataha.
