Re∙anggipa antio mikka jimbee waanichi bang∙a biaprang nisiataniko man∙angaha jeon adita nokdangrang a∙sel obostarangko chagronge janggirangko gimaataona sokaha. Sianggipa manderangni mahari madrangrangna dakchakaniko on∙agita Chief Minister Conrad K Sangma baksa adita Ministerrang, MLA aro sorkarini officerrang mijal salo Dalu, Atisia Songmong aro wilwilao donggipa songrangona re∙ange nirok simsakaniko dakangaha.
Chi dal∙anio baditana kingking nisiataniko man∙ani bidingo name u∙ie ma∙sie ra∙anikoba dakange manderangna dongchakna tarigimin nokrangko Chief Minister nirokean baksana West aro South Garo Hills a∙jani administration baksa tom∙aniko dake chanchirimangjolaha. Unbaksana sianggipani nokdangrangna ex-gratia nigita tangka paisarangko chamatchinaba administration-ko Chief Minister ge∙etangaha.
Duko ga∙akgipa nokdangrang baksa kal∙imaniko mesokpae sorkarinigita chu∙gimik dakchakaniko on∙angnaba Chief Minister ku∙rachakangaha. Una agreba nisiataniko man∙gipa songrangko nirokeaniko dake namtaipilatna aro a∙selo jangnanggipa manderangna nanggipa ja∙kurangko de∙angenga ineba u∙iatangaha.
