Garo Hills-o ru·utgija salrangna skang mikka jimbee waanganichi nok jamrang nisiatako man·gipa nokdangrangna on·gilanirangko da·ona kingkingba dingtang dingtang biaprangoni bang·a dolrang relief camp-rangona sokatangkuenga.
SGH Ruga songona mijal salni bako adita dolrang nangrime chong·motan A·chik A·song Environment Enthusiasts Society (AAEES) aro Dura Motorsports & Adventure Club (DMAC), relief camp-rangona re·ange cha·ani ringani aro gipin nanggipa bosturangko sualangaha. Ia namgipa kamna gipin dolrangba jekai Tribal Nation Riders, I.T.I Tura, Wrestling Association, Bagmara Campers, Tura Teer Association aro Mongri Departmental Store, on·gilanina bakrimangaha.
Apsandaken, Zikzak C&RD block-ni MSRLS-ni ning·o man·gipa Bakrima CLF (Cluster Level Federation) dolrang Dalu-ona re·ange mirong aro tangka paisarangko BDO-na pakwatangaha. Gipin bakrangoniba cha·a ringani, ba·ra kancha, me·dik sam·dik, chi aro uandake gipin nanggipa bosturangko dontonggija sokatangkuaniko nikna man·angkuenga. Ian mingsa mikkangchina nangan salo dakchakgrimaniko, dongkuenggipa aro re·baenggipa salrango A·chik a·songko dilnakenggipa chadamberangna namgipa dakmesokaniba ong·a.
