Batanggimin somoio Adokgre songo sak 80 manderangni dingtang dingtang cha·anirangko brine tarigipa chanako cha·e food poison ba nosto ong·gimin bostuko cha·mane saa naptokani bidingo North Garo Hills District Administration-nigita am·sandianiko dakna a·bachengataha.
Ia obosta Adokgre-ni Chenanggre kal·chakramo robol ka·latmitingo ong·aha jeon manderang saksa chana palgipaniko bree cha·e saa naptokaha. Saa napgipa manderangko Adokgre PHC-ona rimange sanna bannaniko dakangenchimoba sak 6 manderangko saa bilongani a·selo Goalpara aro Guwahati-ona ra·angna nangaha.
Medical department ni u·iatanigitade saa man·gipa manderang kenbegnigipa a·seloni naljoke dongenga. Unbaksana cha·aniko name dake porikka ra·na Shillong-ona watataha jeni report kon sengsoenga ine u·iatangaha.
